2011 წლის 8–11 ნოემბერს ეროვნულმა სამეცნიერო ბიბლიოთეკამ უმასპინძლა ძალიან საინტერესო სემინარს ციფრული ბიბლიოთეკების შესახებ.
ამ ღონისძიების შესახებ განცხადება და სემინარის პროგრამა შეგიძლიათ იხილოთ ღონისძიებების კალენდარში.
სემინარის წამყვანი იყო პროფესორი ტერი პლამი (Terry Plum) აშშ-ს ბოსტონის სიმონსის კოლეჯიდან, რომელიც ამ საგნის ცნობილი სპეციალისტია, ხელმძღვანელობს ამ მიმართულებას თავის უნივერსიტეტში და ხშირად უწევს კონსულტაციებს სხვა ქვეყნებსაც.
აქვე აღვნიშნავ, რომ ბატონი ტერი უკვე მეორედ სტუმრობს საქართველოს, მოხიბლულია მისი სილამაზით და უკვე რამდენიმე პროექტის განხორციელებაშიც მიიღო მონაწილეობა.

ამ სემინარის თემა იყო „ელექტრონული (ციფრული) ბიბლიოთეკები“, რაც გულისხმობს იმას, თუ როგორ ხდება ციფრული ბიბლიოთეკების შექმნის სტრატეგიის და პრიორიტეტების განსაზღვრა, სტანდარტებისა და პროგრამული საშუალებების შერჩევა, ციფრული ობიექტების შექმნა, მათი მეტა-მონაცემების განსაზღვრა და სხვა საკითხები.
ლექციებს ერთვოდა პრაქტიკული სავარჯიშოები: დოკუმენტების სკანირება, მონაცემთა ბაზის (DSpace) შესწავლა, ჩანაწერების შეტანა, ხარისხის მართვის მეთოდები, ინფორმაციის გამოყენებადობა და სხვა.

ჩვენი აზრით, სემინარი ძალიან დროული იყო, რადგან, ერთი მხრივ, საქართველოში უკვე დაწყებულია დიგიტიზაცია, ანუ სხვადასხვა სახის დოკუმენტების (მხატვრული ნაწარმოებების, სამეცნიერო შრომების, უძველესი ხელნაწერების, ფოტო-დოკუმენტების და სხვა) ციფრულ ფორმაში გადაყვანა და ინტერნეტში გამოქვეყნება (ამაში უკვე მონაწილეობენ საქართველოს პარლამენტის ეროვნული ბიბლიოთეკა, ლიბ.ჯე, ხელნაწერთა ეროვნული ცენტრი, ეროვნული სამეცნიერო ბიბლიოთეკა, ზოგიერთი უნივერსიტეტები და სხვა ორგანიზაციები),
მეორე მხრივ, უნდა აღინიშნოს, რომ აუცილებელია ამ სფეროში მოქმედი საერთაშორისო სტანდარტების გამოყენება (რაც ყველა შემთხვევაში არ ხდება) იმისათვის, რომ მიღებული საბოლოო სერვისი, ანუ ფაქტიურად საქართველოს ეროვნული მემკვიდრეობა ციფრული სახით, იყოს თავსებადი სხვა ანალოგიურ სერვისებთან და მომხმარებელმა შეძლოს მისთვის საჭირო ინფორმაციის შეუფერხებლად მოძიება და მიღება.

სწორედ ამან გამოიწვია სემინარის მონაწილეთა დიდი დაინტერესება და მოტივაცია და სემინარიც ძალიან საინტერესოდ და წარმატებით ჩატარდა (რაც აღნიშნა ბატონმა ტერიმაც და სემინარის მონაწილეებმაც). ასეთი ინტერესით ჩატარებული სემინარის შემდეგ, მონაწილეთა ჯგუფი განაგრძობს თანამშრომლობას, რაც უფრო ეფექტიანს გახდის მათ მუშაობას.

ქვემოთ ვაქვეყნებთ სემინარის მასალებს, რომლებიც ყველა დაინტერესებულ პირს თუ ორგანიზაციას შეუძლია გამოიყენოს.

სემინარის პროგრამა
პირველი დღე
მეორე დღე
მესამე დღე
მეოთხე დღე

ფოტოები

სემინარზე
სემინარის შემდეგ

მადლობა გვინდა გადავუხადოთ ქალბატონ ლელა ნანუაშვილს, სემინარის ორგანიზაციისა და თარგმანისათვის.
სემინარის მხარდაჭერა – IREX.

დამატებითი ცნობებისათვის დაგვიკავშირდით ტელეფონზე 2 363413 ან მეილზე irakli@sciencelib.ge