ძველი საქართველოს მონუმენტური მხატვრობა და მისი მოამაგენი = Old Georgian Momumental Painting And Its Guardians/ საქართველოს ეროვნული მუზეუმი; პროექტის მენეჯმენტი: მ. წერეთელი, დ. ქაჯაია, ნ. ჯიქაძე; კატალოგის შედგენა, ტექსტი და შენიშვნები ნ. ჩიხლაძე; ანოტაციები: ნ. ჩიხლაძე, ნ. დათუნაშვილი, მ. გველესიანი; ფოტოგრაფია: მ. მაჭავარიანი, ზ. მახარაძე, გ. ბუმბიაშვილი, ბ. სკრინნიკოვი, მ. კილაძე, რ. არზუმანოვი; თარგმანი: მ. ოდიშელი, ც. ბასილაძე; ქართული ტექსტის რედაქცია ნ. ნადარაია; ინგლისური ტექსტის რედაქცია მ. ვიკერსი; დიზაინი: ი. ხუციშვილი, ი. დევდარიანი, მ. ცოცხალაშვილი. - თბ., 2017. – 320 გვ.  

ISBN  978-9941-9468-5-1

მონუმენტური მხატვრობა საქართველოს კულტურული მემკვიდრეობის უმნიშვნელოვანესი ნაწილია. საუკუნეების განმავლობაში შექმნილი ქართული ფრესკა, რომელიც მონუმენტური მხატვრობის ერთ-ერთი მიმართულებაა, ერის კულტურული იდენტობის მნიშვნელოვანი შემადგენელია.
წინამდებარე ორენოვანი წიგნი წარმოადგენს პირველ მასშტაბურ გამოცემას ქართული მონუმენტური მხატვრობის ძეგლთა შესახებ. მასში მოთხრობილია შუა საუკუნეების ქართული მონუმენტური დეკორის ცამეტსაუკუნოვანი განვითარების ისტორია იმ სახვითი არტეფაქტებით, რომლებმაც ქართული კულტურის დამცველი, გადამრჩენი და შემსწავლელი ადამიანების წყალობით, ერთი საუკუნის განმავლობაში თავი მოიყარა ეროვნული მუზეუმის საცავებში. გამოცემა ნათლად წარმოაჩენს აღნიშნულ კოლექციაზე მოამაგე ადამიანებს - მეცნიერებს, მხატვრებს, კოპიისტებსა და რესტავრატორებს.
ნაშრომი მოიცავს 500-ზე მეტ ფოტოს, რომლებზეც ასახულია V-XVIII საუკუნეების განმავლობაში ქრონოლოგიურად დალაგებული და იდენტიფიცირებული კედლისა და იატაკის მოზაიკის, ასევე მონუმენტური მხატვრობის დედნები, ასლები და ჩანახატები. მათი მნიშვნელოვანი ნაწილი უკვე აღარ არსებობს ან მდებარეობს დღეისათვის ხელმიუწვდომელ - ოკუპირებულ ტერიტორიაზე.
წარმოდგენილ ასლებს შორისაა ქართული მონუმენტური მხატვრობის შესწავლა-გადარჩენის საწყის ეტაპზე შესრულებული საუკუნეზე მეტი ხნის ნიმუშები. აღსანიშნავია, რომ ისინი შეიქმნა ექვთიმე თაყაიშვილის მიერ დაარსებული საისტორიო და საეთნოგრაფიო საზოგადოებისა და დიმიტრი შევარდნაძის თაოსნობით დაფუძნებული ქართველ ხელოვანთა საზოგადოების ერთობლივი ინიციატივით. წიგნი ეძღვნება 1917 წლის „ძველი ქართული საეკლესიო ფრესკების" გამოფენის ასი წლის იუბილეს.